Joriy yilning 7-sentyabr kuni Qo‘ng‘irot tumanida 47-sonli "Sanoat" va Bo‘zatov tumanida 56-sonli "Bo‘zatov" okruglarida bo‘shab qolgan o‘ringa Qoraqalpog‘iston Respublikasi Jo‘qorg‘i Kengesi deputatlari saylovi bo‘lib o‘tishi belgilangan.

Shu munosabat bilan Qo‘ng‘irot va Bo‘zatov tuman saylov komissiyasi, tegishli okrug hamda uchastka saylov komissiyalari raisi, o‘rinbosari va kotiblari uchun 26-27-avgust kunlari o‘quv-seminar tashkil etildi.

O‘quv-seminar O‘zbekiston Respublikasi Markaziy saylov komissiyasining 2024-yil 27-may kuni qabul qilingan "Saylov komissiyalari a’zolarining bilim va ko‘nikmalarini oshirishni tashkil etish to‘g‘risida"gi 1331-sonli qaroriga asoslangan bo‘lib, seminar davomida komissiya a’zolariga saylovlarga tayyorgarlik ko‘rish va ularni o‘tkazish bo‘yicha tartib-qoidalar bilan keng tushunchalar berib o‘tildi.

Jumladan, Qo‘ng‘irot va Bo‘zatov tumanlari hokimliklarining tashkiliy-kadrlar guruhi rahbarlari O.Ametov va A.Xasanovlar o‘quv-seminarni ochib bergan bo‘lsa, Qoraqalpog‘iston Respublikasi Markaziy saylov komissiyasi a’zolari K.Yerjanov, K.Kaypov, Qoraqalpoq davlat universitetining professor-o‘qituvchi trenerlari M.Najimov, M.Tileumuratov, A.Jumanov va Ye.Allambergenovlar Saylov qonunchiligiga muvofiq saylovga tayyorgarlik ko‘rish va uni o‘tkazishga oid norma, qoidalar bilan komissiya a’zolarini tanishtirib o‘tdi.

Shuningdek, seminarda so‘zga chiqqanlar muhim siyosiy tadbirni saylov qonunchiligi talablari asosida yuqori saviyada o‘tkazish bo‘yicha o‘z fikrlarini bildirmoqda.