Бүгин, яғный 23-октябрь күни ҒМДА Парламентлер аралық Ассамблеясынан Демократияның раўажланыўы, парламентаризм ҳәм пуқаралардың сайлаў ҳуқықларына әмел етилиўин мониторинг етиў халықаралық институты мәсләҳәтшиси Волков Юрий Николаевич Қарақалпақстан Республикасы Орайлық сайлаў комиссиясында болып, комиссияның жумысы менен жақыннан танысты.

Халықаралық бақлаўшыны Қарақалпақстан Республикасы Орайлық сайлаў комиссиясының баслығы Зийўатдин Камалов күтип алды.

Ол дәслеп сайлаў комиссиясы жайласқан имаратта комиссияның жумысы ҳәм сайлаўға байланыслы мағлыўматларды көзден өткерди. Соңынан, Қарақалпақстан Республикасы Орайлық сайлаў комиссиясы жанындағы Баспасөз орайы ҳәм комиссия ағзалары менен ушырасты.

Халықаралық бақлаўшы Комиссия баслығына шын жүректен қабыллағаны ушын миннетдаршылық билдирип, буннан соң сайлаў участкаларының жумысы менен танысатуғынлығын айтып өтти.

Қарақалпақстан Республикасы Орайлық сайлаў комиссиясының

Баспасөз орайы